Sheṯaan gwigukinu jidhileo alif
1 A nyi gwaŋadhi malaak gwulo gi Sama, gwuthi muftaẖ gwa dhel dhina dholaŋ ganu a jijir jina jinaŋ gi dhoi dhuŋun. 2 Ŋwumutha dhumeo, dhuma dhina dhurun, dhina dhan Ibliis, a Sheṯaan, ŋwuguke jidhileo alif, 3 a ŋwugatho gi dhel ganu dhina dholaŋ ganu, ŋwulaŋthajo, a ŋwukhathimiye, dathuŋw dhudhiyo liumam manaŋ no, di muŋwbudhe jidhileo alif. A gidon gi dhuŋun ibidha aram gwagududhini galo kaija gitiny. 4 A nyi gwaŋadhi keraasi, a lina lijinalaŋ alidhedha ŋelenya ŋadhakimiye. A nyi gwaŋadhi digirima da ŋediŋa lina lirinyinu gi dhuŋun dha shahaada gwa Yasuuⓐ, a gi dhuŋun dha dhuŋun dha Kalo, a lina lati lidijo kowaŋu ŋwurko ŋwai, i s̱uura gwuŋun, i athiluminyu ŋule ŋuŋun gi nyoul alaŋ nyegen, i gi doi alaŋ degen no; almidhe a aluthi ŋelenya al Masiiẖ ŋalai jidhileo alif. 5 Abi liji lina laio lina lidhainu athilbimidho manaŋ no di ma jidhila jina jiro alif erna. Ibigwa gwiro dire dai gwina gwiro kwerkwereny. 6 Kwiji gwibarikinu a gwiŋir didirel gwina gwuthi aicaijiyuŋw liduŋw gi dire dai gwina gwiro kwerkwereny. Ai gwina gwiro nimra ram gwati gwuthi ŋelenya degen alaŋ no, abi laji laro gusus ga Kalo a ga al Masiiẖ, aluthi ŋelenya ŋeda ŋalai jidhileo alif.
Gududhini galo gwa Sheṯaan a ŋoŋor ŋina ŋimirudhi
7 A maji ma jidhila jina jiro alif erna, a Sheṯaan gwagududhini galo gi sijn gwuŋun, 8 a gwatuiya duŋwdhudhie liumam lina lo gi ŋwubil ŋwina ŋwiro kworoŋo ŋwa gidhila, Juwaj a Maajuwaj, duŋwulwureje liduŋw dilapai ŋoŋora; lina luthi ⓐadad gwegen gwina gwiro ŋinena amur ya baẖr. 9 Alalo gi ore ganu gwa gidhila, a lurejo khema galo ga liji lina liŋir didirel a mediina gwina gwuminyinu; a iga ula di Kalo gi Sama, ŋwulduni. 10 A Ibliis gwina gwathildhudhiye gwiguthinu gi baẖr gwa iga a kibriit, kalo gina gijina kowaŋ a nebi gwina gwiro gwidhuŋun, alumini ŋiya ninaŋin a gigilo gwortal di gwortal. 11 A nyi gwaŋadhi kursi gina ginaŋ gina gipidho, a gwina gwijinalaŋ, gwina gwabiro gidhila a Sama gi je ganu juŋun; athi kalo bujinu gan ŋediŋa no. 12 A nyi gwaŋadhi lijo lina laio, lina litilitiny a lina lipilipa, lidhunudhi gi je ganu ja Kalo; a jitham igini, a kitham giter igini, gina giro kitham gadhi midhe. A liji akimini lina laio gi dhuŋun dhina dhulinu gi jitham, gi dhuŋun dha ŋiro ŋegen. 13 A baẖr apai lijo lina laio lina lijina ganu; a ai a kalo gina gathin liji je lina laio apai lijo lina laio lina lijina ganu; alakimini peth gweta gweta gi dhuŋun dha ŋiro ŋuŋun. 14 A aiŋa kalo gai gina gathin liji je lina laio guthini gi baẖr gwa iga. Ibigwa gwiro ai gwina gwiro nimra ram. 15 A ada gweta gwati gwimabujini gwulinu kitham gadhi midhe no gwaguthini gi baẖr gwa iga.
© First published by the British and Foreign Bible Society in 1966.