Akimiye gwa dhuŋun dha guginudhe ganu
1 A nyi, limega lai, nyi gwati gwuthi ŋoma dajabiŋaijo gwiro ŋinena liji lina luthi Dhigirima no, abi nyi gwajabiŋaijo gwiro ŋinena liji lina luthi aŋina, a gwiro ŋinena keleŋa gina gitigitiny gi al Masiiẖ. 2 Nyi gwimajice ŋan, a nyi gwati gwidhedhaje ji no; abi kwereny nyaŋa lati luthi ŋoma deny no, a ŋinena ko nyaŋa lati luthi ŋoma no. 3 Ŋinena nyaŋa loma luthi aŋina; nyaŋa luthi ŋijigora, a kaijiye gi je, a guginadhini ganu, nyaŋa loma luthi aŋina, nyela gwiro ŋinena liji a? 4 Maji ma gweta arnu, Nyi gwiro gwa Buulus; a gwiter arnu, Nyi gwiro gwa Abulluus; nyaŋa lati luthi aŋina na? 5 Ei gwiro gwan Buulus? a ei gwiro gwan Abulluus? Abi ŋediŋa liro jadham jina juminyanyajai, gwiro ŋinena man Kweleny dhedha kwijo gweta gweta. 6 Nyi gwiriyo, a Abulluus ice; a Kalo direye. 7 A minoŋ gwina gwiriyo gwiro tur, a gwina gwico gwiro tur; abi Kalo giro gina gathidireye. 8 A gwina gwiriyo, a gwina gwico liro letipo; abi gweta gweta degen gwaji gwapai ujra yuŋun gwiro ŋinena ŋiro ŋuŋun. 9 Anaŋa lathapaijie ŋiro Kalo ŋalai; nyaŋa liro dhiruiny dha Kalo, a aice gwuŋun.
Dhuŋun dhina dhiro daruri dha muⓐallimiin
10 Gwiro ŋinena niⓐma gwa Kalo gwina gwidhedhiny, nyi gwiro ŋinena gwartho gwina gwathaice, nyi gwimageta dhugul, a gwiter dhuŋwunaice alaŋ. Abi aram gweta gweta gwadaŋa galo dhuŋwunaice alaŋ akwai. 11 A minoŋ kwiji gwati gwageta dhugul dhiter no abi dhina dhigitinu, dhina dhiro Yasuuⓐ al Masiiẖ. 12 Abi ada gweta gwimaice gi dhugul ibidha dahab, i faḏḏa, i nyol nyina nyoinyadho luro, i ŋwure, i karo, i ŋwuboraŋ; 13 ŋiro ŋa gweta gweta ŋaji ŋaŋini; abi lamun lo lina laji luŋwul lai aŋiniye gi iga; a iga yaji idheje ŋiro ŋa gweta gweta ŋiro dhaŋ? 14 Ada ŋiro ŋa kwiji gweta ŋimaje ŋina ŋaicuŋw ŋai, gwaji gwapai ujra yuŋun. 15 Ada ŋiro ŋa gweta ŋima ude, ŋeda gwadhudhie ŋida ŋuŋun; abi ŋeda gwaji gwagilaŋini gi iga ganu. 16 Nyaŋa lati liliŋidhi darnu nyaŋa liro hekal gwa Kalo, a Dhigirim dha Kalo dhathije dagalo na? 17 Ada gweta gwimakiye hekal gwa Kalo, gaji gwa Kalo kiye; ŋinena ro hekal gwa Kalo gwiŋir didirel, gwina gwiro nyaŋa.
18 Athathi gweta ukinejo gwidom ganu gwuŋun no. Ada gweta gwimari gwibebra dagalo ganu kidhila ibiga, abricul ŋwuro girila, duŋwuro gwibebra. 19 Ŋinena ro bebra gwa gidhila ibiga gwiro ŋirila di Kalo. Dhulinu darnu, Gwathapai lijo lina libebra ŋwujimi ŋegen. 20 A ko, Kweleny gwiliŋidhi darnu afkaar gwa liji lina libebra gwiro tur. 21 A minoŋ athathi kwiji gweta are ŋamilai liji lai no, ŋinena ro ŋidi peth ŋiro ŋalo. 22 Ada Buulus, i Abulluus, i S̱afa, i gidhila, i midhe, i ai, i ŋidi ŋina ŋo, i ŋina ŋaji ŋila; peth ŋiro ŋalo. 23 A nyaŋa liro la al Masiiẖ; a al Masiiẖ gwiro gwa Kalo.
© First published by the British and Foreign Bible Society in 1966.